Bawng zun litre-ah Rs. 4-in leisak dawn

13 Nov 2026: Vawiin khan Cooperation Department, Govt of Mizoram leh Mizoram Milk Producers’ Cooperative Union Limited (MULCO) tangkawp chuan Mizoram Cooperative Apex Bank (MCAB) Headquarters Auditorium, Tuikual South, Aizawlah, ZOLIFE (Zo Livelihood and Family Empowerment) Project hnuaia bawng vulh punna tur (cattle induction) chungchangah Stakeholders’ Convention an buatsaih a, Cooperation Minister Pu P.C. Vanlalruata chu khuallian niin hun a hmanpui.

He hunah hian Cooperation Minister Pu P.C. Vanlalruata chuan, MULCO chu Cooperation Department hnuaia federation a ni tih sawiin, a dinhmun chu a that loh avangin Sawrkar Flagship programme Banakaih hmanga kaih chhuah Sawrkarin a tum thu a sawi. Minister chuan Cooperation Department chu MULCO mai bakah NABARD te thawhpuiin chhungkaw 100 tan bawng vulh pun lamah hma lak a nih tur thu a tarlang.

Minister chuan he project hnuaia thlan chhuah te chuan a thlawn tawpa dawng lo va, pek chhuah an neih ve a ngaih tur thu sawiin, chhungkaw 100-ah bawngpui pahnih (2) theuh atang bul an tan dawn a ni, a ti a. Hei bakah hian thlan chhuah “beneficiaries” te atangin Agriculture Department chuan natural farming hnuaiah bawng zun chu litre-ah ₹4-in a leisak dawn bawk a ni. He project hmang hian chhungkaw tam takin eizawnna an hmuh a, Mizoram bawnghnute thar chhuah pawh a pun ngei a beisei thu Minister chuan a sawi a, thlan chhuahte chu theih tawp chhuah tura fuihin, an hlawhtlin ngei theih nan a duhsakna a hlan nghal bawk a ni.

Cooperation Secretary Pu Chaudhary Mohammad Yasin pawhin, Mizoramah chuan bawnghnute mamawhna a san hle laiin a thar chhuah kawngah kan hnufual hle tih a sawi a, kalkhawmte chu an zirho turah te uluk taka ngaithla a, hlawkpui ngei turin a duhsakna a hlan a ni.

Technical session-ah hian project kalpui dan tur kawng pawimawh tak tak te tarlan a ni a, chung zingah chuan NABARD mawhphurhna leh he project tana a tangkaina te, Animal Husbandry & Veterinary Department hnuaia technical assistance leh livestock development te leh bawng vulhtute tana financial inclusion, banking support leh credit linkage tihhmasawnna kawnga Mizoram Cooperative Apex Bank mawhphurhnate sawiho a ni. Ran hriselna, natna laka invenna leh science thiamna hmanga ran enkawl chungchang te, bawnghnute thar chhuah tihpun a pawimawhzia te zirho niin, deworming (rulhut hlo pek) leh vaccination (hri danna pek) chungchangah inhrilhhriatna “awareness session” buatsaih a ni bawk.