Lalremsiami Hockey Ground hmun tur enfiah

14 Sept 2026: Vawiin khan Mizoram Legislative Assembly Deputy Speaker leh bialtu MLA ni bawk, Pu Lalfamkima chuan Lalremsiami Hockey Playground siamna hmun tura ruahman, Kolasib Diakkawn GSA Playground chu a hmunah kalin a enfiah.

Deputy Speaker Pu Lalfamkima chuan, Kolasib Diakkawn Games & Sports Association (GSA) leh Kolasib District Hockey Association te inremsiamna angin, he khelmual hi Hockey khelmual atana hman turin ruahmanna kalpui mek a nih thu a sawi a. Khelmual leh a kaihhnawih hmunhma turte, a zawl chin awmsa zau zawng leh sum mamawh zat tur (Plan & Estimate) chu PWD leh Hockey lama thuneituten uluk taka an siam hnuah Planning Department-ah thehluh a nih tur thu a sawi.

Pu Lalfamkima chuan, Mizoram Sorkarin Mizo nula, infiammi chhuanawm Lalremsiami chawimawina atan a hming chawiin he Hockey khelmual hi  ruahman a nih thu a sawi a. Khelmual hming atan hian ‘Lalremsiami Hockey Ground, Diakkawn Field’ tih  a ni ang, a ti. Kumin August ni 18, 2026 khan infiammi 17 zingah Nl. Lalremsiami hian India rama infiammite chawimawina sang, Arjuna Award a lo dawng tawh a ni.

Vawiina Diakkawn GSA Ground a hmunah enfiah a nih hian khelmual a zawl awmsa chin a vang zawng chu metre 81 a ni a, a dung thui zawng chu metre 113 a ni. Kolasib Diakkawn GSA leh Kolasib District Hockey Association inremna ang hian a zawl awmsa chin zawng chu Hockey khelmual atana ruahman a ni a. He inremna hi kum 3 chhung atana tih phawt niin, a tul dan anga pawhsei theih a ni ang a; kum 2028 thlenga Sawrkar hmalakna a awm lo a nih chuan inremna hi  hnuhkir leh tur a ni.

He hunah hian Pu Lalhmuhchhuaka,Senior Vice President, Hockey Mizoram leh Office Bearer dangte; Pu Lalruatfela Zote, Coach, Boys Hockey Academy, Sports Department, Kawnpui; PWD Official-te leh Diakkawn GSA hruaitute an tel a ni. (DIPR)