Youth Conclave 2026 buatsaih dawn

27 Oct 2026: Full Life Access Trust (FLAT)/ Nuntam Kailawn Lunglei hruaitute chuan vawiin chhun dar 12:00 khan Lunglei Press Club ah MJA Lunglei Member-te kawmin; October ni 30 2026 a Youth Conclave buatsaih an tum chungchang an sawi fiah.

Vawiina MJA member-te an kawmna hi Rebek Lalruatdiki Khiangte, Executive Director-in a kaihruaia, kum 2025-ah Youth Conclave hlawhtling tak an lo buatsaih tawh tih sawiin, a hlawhtlinna te zirchiangin Lunglei thalaite tan buatsaih leh ngei tha an tih thu leh Mizoram hmun hrang hrang atangin thalai 300-500 te chu hlawhtlinna, hlawhchhamna, hriselna leh nakin hun chungchang tlang taka sawiho turin an sawm khawm leh dawn a ti.

Youth Conclave 2026 hi October ni 30 2026, zing dar 10:00 atanga tlai dar 4:15 thleng a ni dawn a, zing dar 9:15 atangin Registration tih theih a ni ang. Youth Conclave hi UPC Conference Hall, Lungleiah neih tur niin, Khuallian atan Pu V.Malsawmtluanga, MLA, Vice Chairman HPC chu an beisei tih FLAT hruaitute chuan an sawi.

Kumin Youth Conclave-ah hian thalaite chu thupui pali, Beyond the filter: Khawvelin min thlir reng lai hian tunge ka nih, vantlang hmuh theiha a thalai chauh lantirna phenah hian kan nihna tak tak enge (Social Media, intehkhin, beiseina). The Art of not giving up: Nun hi kan ruahman anga a kal loh hunah emgtin nge ka kal zel ang. The Road Ahead is Ours: Nakin hun eng ang nge ka hmuh a, eng ang nakin hun nge kan siam mek. Strong Enough to Ask for Help: Engvangin nge keimah chiahin engkim ka tih vek a ngaih loh tih thupui hmangte hian hun an hman dawn thu an sawi.

Heng thupui hrang hrang sawi tur hian Pu Lalzuithanga (Chairman, LMC), Pu Vanlalngaihsaka (Saka) zaithiam, Dr.Lalropuii, (Councelling Psychologist, Black Olives Centre) Pi Lalhriatpuii, (Puipuii Goods dintu ) leh Dr.Steven Lalsangliana (Master, Aizawl Christian Academy) te an ni dawn tih an sawi bawk.

FLAT hruaitute chuan he Youth Conclave-ah hian Best Business Idea Award mi pahnih hnenah Rs Sing 5 ve ve an pek dawn thu leh zanlen taka thalaiten an duh zawng an sawi theih dawn bakah puitlingte’n an hmuh kan fo thin, thalaite phurrit chu hming tarlang lovin an sawi thei dawn an ti a, Cultural Programme en tur a awm dawn bawk an ti.

FLAT leh YOUTH CONCLAVE thil tum thuhmun pakhat chu, thalaite chu mahni inringtawk, midangte ngaihsak mi leh khawtlang tana mi tangkai ni tura chher puitlin a nih thu an sawi.