Police-te’n Bank Account hack sak atangin Rs. Nuai 10 chuang an hmuhlet sak

28^th August 2026: Serchhip Police Station chuan May 2026 thla tir khan RTO E-Challan click avanga buaina case engemaw zat an dawng a, chung zinga mi pahnih R.Lalchhandama bank account (Slice Small Finance Bank Serchhip) atangin Rs.13,92,000 leh Robert Zoremmawia te bank account (MRB) atangin Rs.2,09,000 a (an laksak) chhuah thu complaint an dawng a ni.

Hetih hunlai hian ICJS account re-activate dilna an process mek lai anih avangin NCRP Portal access theih a ni lo a, Cyber Criminal-te pawisa tihchet lamah an tuan a ran avangin, hetih hunlaia OC, Serchhip PS Inspr. R. Lalbiakhlua chuan a rang thei ang bera buaipui-in, chak takin victim-te hma a lak pui a. phone call leh a theih ang anga hmala in case hi a bawhzui a ni. 

Serchhip Police te atanga thu kan dawn danin, R. Lalchhandama pawisa hi Ram Jeevan Shah nia hriat account (Bank of Maharastra, Mumbai) leh account dang 2 rinhlelhah a lut nia hriat ni a,  Pu Robert Zoremmawia pawisa luhna hi Punjab National Bank, Jhanjharpur Bihar a ni tih hriat a ni bawk a, heng account rinhlelh te hi freeze nghal an ni.

Heng account freeze atanga pawisa lalet leh tur hian Court Order a ngaih avangin Serchhip District Court lamah requisition vawi 3 lai dil a ni a, requisition te hi Bank of Maharastra leh Punjab National Bank lamah soft copy leh hard copy a thawnin, Bank lam Ukil ten an pawm hnu ah account freeze te atang hian tun thla August, 2026 chhung hian Pu R.Lalchhandama pawisa bo Nuai 13,92,000 atangin Rs.9,12,707 chu Ram Jeevan Shah  account ni a hriat atang hian lak let leh niin, account dang 2 rinhleh te pawh hi enzui a vil zui mek an ni. 

Pu Robert Zoremmawia pawisa bo Rs.2,09,000 atang hian Rs. 1,59,627 te laklet sak leh a ni bawk. 

Serchhip Police Station hian RTO E-Chalan Scam chungchangah hian mipui zirtirna video clip te siamin Social Media-ah te an thehdarh a, hetihlai hian RTO E-Challan Scam avang hian case engemaw zat neiin, he thil avang hian phone engemawzat set thatsakte pawh an lo nei tawh bawk a, Scammer-te hian sum tam tham deuh bitum bik an neih thin avangin sum bothlau erawh an tam vak lo niin a lang.

Hetiang ang Scammer hi an la pung tulh tulh dawn niin a hriat a, link hriatchian loh hmeh mai mai te, sum peipunna sang lutuk te, leh online hmanga sum hmuh awlsamna lutuk lakah hian mipuite pawh kan fimkhur a tul hle a ni. (DIPR)