Thubuai 106 ngaihtuahah thubuai 48 chinfel a ni

09 May 2026:- Vawiinah District Legal Services Authority, Lunglei buatsaihin National Lok Adalat; District Court Building, Lunglei-ah neih a ni a, Lunglei District-a thubuai 106 ngaihtuah a ni.

Vawin Lok Adalat-a thubuai ngaihtuah tur hian Bench pahnih a siam niin, Bench-I hi Pi Lalthansiami Hnamte, Civil Judge (Senior Division-II) in kaihruaiin, Pu B. Laldinpuia, Advocate leh Pu Chawngchhuana Chawngthu, Social Worker-te an thu a, Bench-II hi Pu C.Lalbiakmuana, Judicial Magistrate First Class-in kaihruaiin, Pi H.Lalruatfeli, Advocate leh Upa P.C. Sangthuama, Social Worker-te an thu a ni.

Thubuai 106 atang hian thubuai 48 sawi rempui niin, tihfel a ni.

Vawiina thubuai ngaihtuahah hian leiba inṭhinna tam berin, Rs.87,37,931/- lai chinfel a ni.

Lok Adalat-ah hian thubuai neitute duhdan angin inremna ziahpui ṭhin a ni a, sum sen ngai lovin, ukil rawih man ngai lova thubuai hi chinfel sak ṭhin a ni.