Tualthattu na taka hrem phutin an pungkhawm

27 Oct 2026: Vawiin chawhnu dar 1:00 khan Lunglei Rahsiveng mipuite chu an veng chhunga tualthahna thlenga tualthattu na taka hrem phutin Sikul mualah an pungkhawm.

Jt. NGO Rahsiveng huaihawt punkhawm hi YMA aiawhin Pu Vanlalpeka Ngente-in a kaihruaia YMA, MHIP leh MUP  President theuhte’n an venga tualthahna thleng an dem thu leh tualthattu chu dan angin a na thei ang ber hrem an duh thu bakah Rahsiveng chhungah ruihhlo zawrh an duh loh thu te an sawi a ni.

Vawiina pungkhawmte hian Rahsivengah ruihhlo avanga tualthahna thleng an duh loh thu te, Rahsiveng tlangval Ricky Lalhruaitluanga thattu a puh Lalthanpuia a na thei ang bera hrem an duh thu te, Lalthanpuia Bail a chhuah an duh loh thu te, Rahsivengah ruihhlo zuar an zalen lutuk an duh loh thu te leh Rahsivengah ruihhlo do tura mipuite an tanrual zel dawn thu te in an au rual a ni. Rahsiveng mipui punkhawmnaah hian resolution siamin an pass a ni.

Ricky Lalhruaitluanga S/o C.Thanhliri, Rahsiveng-in, Lalthanpuia S/o Lalengmawii kut a tawrh avanga Oct ni 4, 2026 dar 11:18am ah a nunna hlu tak a chan hi All NGO (YMA, MHIP & MUP) Rahsiveng chuan pawi a ti takzet a. Kan khawtlangah hetiang thil duhawm lo tak mai a thleng hi tun hnuah thleng tawh ngai lo se a duh takzet a ni,  

Ricky Lalhruaitluanga kutthlaktu Lalthanpuia hi dan anga a na thei ang bera hrem turin thuneitute kan phut a ni.

Tualthattu Lalthanpuia hi Rahsiveng mipuiten Bail a chhuah kan remtilo.

Kut tuara boral Ricky Lahruaitluanga hnenah sorkar atanga zangnadawmna awm thei angte a rang thei ang bera pe turin sorkar kan phut a ni.

Kan khawtlanga ruihhlo zuarte chungah All NGO chuan theihtawpin hma a la zel dawn a, khawtlang pawisalo leh zahlote chungah dan anga hmalak zel a ni ang, tiin Resolution an Pass a YMA, MHIP leh MUP President theuhte’n an hming an ziah hnan a ni.