State Sports Centre, Zobawk chungchanga hmalak zel dan tur sawi ho

13 Nov 2026: Vawiin khan Sports & Youth Services (SYS) Minister Pu Lalnghinglova Hmar hovin Lunglei High Powered Committee (HPC) Vice Chairman hnathawh pindanah Lunglei Zobawka State Sports Centre sak lai chawlh lailawktir mek chungchangah ramngaw tihchereu a nih loh nana forest clearance nei tura hmalakna hrang hrang leh Compensatory Afforestation (CA) siam tura ruahmanna leh rawtna awm mekte sawi ho a ni.

He hunah hian Lunglei Municipal Council (LMC) Executive Councillor Pu Zorinsanga Hmar leh Ward No. XI Councillor Pu Vanlalliana Pachuau te; Sports & Youth Services; Environment, Forests & Climate Change; Urban Development & Poverty Alleviation; Land Revenue & Settlement; HPC leh Information & Public Relations official-te an tel a. State Sports Centre chungchanga hmalakna kal mek thlir ho niin, ṭha taka chhunzawm a nih theih nana inbuatsaihna hrang hrang kalpui dan tur sawi ho a ni.

State Sports Centre sakna tur hian Zobawk ram chhungah kum 2012 aṭang khan thawh hniha hma lak niin, a sakna tur hmunhma hi Tlawng Riverine Reserved Forest (RRF) huam chhung a nih avangin forest clearance lak ngai a ni a. Forest clearance a awm hma leh a aia ramngaw dang siamna tur Compensatory Afforestation (CA) tihfel a nih hmaa hmalak ṭan anih avangin, mi ṭhahnem ngaite’n National Green Tribunal (NGT)-ah an thlen a. NGT-ah thubuai a awm tawh avangin November ni 11, 2022 khan hma lak zui theih lohva tihtawp lailawk niin, NGT thubuai rem dan azirin hma lak zui theih a ni chauh dawn a. Vawiina SYS Minister hova ṭhutkhawmah hian NGT thubuai a fel theihna tur leh ṭha taka project kalpui chhunzawm a nih theih nana hmalakna kal mek leh hmalak zel dan turte sawi ho a ni.

Lunglei Divisional Forest Office Pu Lalduhthlana’n Reserved Forest chungchanga inkaihhruaina te, State Sports Centre hmunhma dinhmun leh tuna thubuai kal mek dinhmun te a sawi fiah a. LMC Ward No. XI Councillor Pu Vanlalliana Pachuau te, LR&S leh SYS department aiawhte’n an hmalakna report an sawi bawk.

SYS Minister Pu Lalnghinglova Hmar chuan Lunglei Zobawka State Sports Centre chu sawrkarin a hlawhtlin duhin a vei hle tih sawiin, tunah pawh theih tawpa bawhzui mek a nih thu a sawi a. He project atan hian kum 2010-ah cheng vaibelchhe 17 dah a nih thu leh kum 2021-ah cheng vaibelchhe 34 dah belh leh a nih thu sawiin, Mizoram State project-ah chuan a lian berte zinga mi a nih thu a sawi a. Sawrkarin sak zawh vat a, hman thuai thuai duh mah se, NGT thubuai avangin chet hleih theih a nih loh thu sawiin, a chin fel dan tur ngaihtuah reng a nih thu leh a kawng a thui deuh avangin leh sawrkar kut a nih tawh loh avangin duh anga a kal chak theih loh thu a sawi a. Hma lakna tur hmun ai awh atana ramngaw dang siam tura hectare 4 ruahman chu inkaihhruaina danin hectare 5 tal a lo phut avangin hectare 5-ah tihzauh a nih thu leh siam fel hnuah department lamah rawtna theh luh a nih leh tawh thu sawiin, Department lamah bawhzui a, theih tawp chhuah zui a nih tur thu a sawi.

Minister chuan State Sports Centre sak tura ramngaw tihchhiat a nih loh nana thubuai theh luttute chu an sual vang ni lovin, inzirna tur leh dik leh ṭha zawka hmasawnna a kal theih nana dan hmanga thubuai theh lut an nih thu a sawi a. Sawrkar leh a kaihhnawih department hrang hrangte’n a chin felna turin theih tawp an chhuah tlan tur thu sawiin, sawrkar kut a nih loh avangin beisei ang erawh chuan a rang thei dawn lo tih a sawi a. State Sports Centre chu Lunglei mai ni lo, ram pum tana ro tling tur a nih avangin a puitlin theihna tur leh hlawhtlin theihna tura theih tawp chhuah tlang tur leh sawrkar hma lakna thlawp a, ṭawiawm zel turin sawrkar official-te, tlawmngai pawl leh mipuite a ngen.